Casa de Cultura Enriqueta González Rubín

El próximu 17 d’abril cumplense 189 años del nacimientu de la escritora ribeseyana Enriqueta González Rubín.  Foi amás maestra y periodista, pero, sobremanera, una muyer comprometida col tiempu que-y tocó vivir, espresáu na crítica política de los sos escritos y nel compromisu cola educación de les muyeres.

Desenvolvió la so producción escrita en llingua castellana y en llingua asturiana, considerada nesti últimu casu una figura clave y l’autora más importante del sieglu XIX. Nel añu 1875 publicó la primer novela conocida n’asturianu,  “Viaxe del tíu Pacho el Sordu a Uviedo”,  onde realiza una crítica de la política y de la economía de la época, que güei taría de perfecta actualidá. Fueron tamién numberoses les sos collaboraciones periodístiques, dalguna, incluyida na publicación Memories Asturianes nel añu 1890.

Si dende va dellos años la figura y el llabor de Enriqueta González Rubín supieron ser reconocíes en dellos ámbitos, creemos que nun lo foi abondo nel conceyu que la vio nacer. Tamos agora énte una bona oportunidá pa saldar la delda y que’l so nome pase a formar parte del de la Casa de Cultura Municipal de Ribeseya. La so tierra debe-ylo.

Axuntamos a esta publicación l’escritu rexistráu nel Conceyu de Ribeseya