LOS PRESUPUESTOS, EL REMANENTE Y LA DEMAGOXA

Nel pasáu Plenu aprobáronse los presupuestos pal exerciciu 2018 nel Conceyu de Ribeseya / Ribadesella, como se ta faciendo muncha demagoxa con ello y coles inversiones que “gracies” a los sofitos de dalgún grupu municipal, van realizase en Ribeseya / Ribadesella, creemos bien conveniente esplicar a la población ribeseyana la verdá del asuntu y depués, que cada quien, saque les sos propies conclusiones. De mano, esclariar que lo aprobao’l pasáu miércoles, nun recueye nenguna de les obres coles que, de gaita y tambor, nos tán bombardeando nos últimos díes, argumentando que se van a faer gracies al sofitu presupuestariu.
El presupuestu aprobáu ye’l mesmu que nos presentó Foro nel mes d’abril, ensin una solo enmienda y que yá se refugó nel Plenu Ordinariu del mes de mayu.
Fálase enforma del remanente y creemos qu’habría qu’esplicar d’onde sal esi remanente. Esi remanente sal, por casu, d’axudicar obres o servicios per debaxo del preciu de la llicitación inicial. L’axudicar obres o servicios a un costu bien baxu, munches vegaes, lo que trai ye problemes nel acabáu, calidá o tiempos d’execución.
Vamos poner un exemplu d’ello que tol mundu va a entendelo.
Les obres de la Sienda de Tito Bustillo teníen un valor envaloráu de contratu de 424.950,48 euros; esti valor, vien determináu pol importe total, ensin incluyir el IVA, pagaderu según les estimaciones del órganu de contratación.
La estimación tien de faese teniendo en cuenta los precios habituales nel mercáu y tar referíu al momentu del unvíu del anunciu de llicitación, y tien d’incluyir cualquier forma d’opción eventual, y la valoración de les prórrogues y cambeos previstos nos pliegos.
Per otru llau ta l’importe de la obra ,que ye l’importe base de la llicitación, IVA escluyíu, ensin incluyir les eventuales opciones, prórrogues y cambeos, ésti ye’l que los licitadores (empreses qu’opten al contratu) tomen como referencia pa facer les sos ufiertes, nesti casu yera de 303.536,03 euros y la obra axudicóse finalmente en 209.995,00 euros; ufierta qu’en principiu consideradóse como baxa temeraria, ye dicir que duldábase de la viabilidá pol so baxu costu, yá que suponía una baxa sobro’l presupuestu de llicitación del 30,86%. Pero que dempués s’almitió como bona ,al dar por bones les esplicaciones de la empresa, argumentando esa baxa, na so habilidá p’axustar colos sos proveedores, pa llograr los materiales necesarios, la propiedá de la maquinaria a emplegar, el paga-y a los sos trabayadores con arreglu al conveniu de la construcción del 2016 y el compromisu de rematar la obra’l 7 de xunetu del 2018.
De tolos inconvenientes y sufrimientos que los vecinos y les vecines de Ribeseya / Ribadesella llevamos padeciendo nesti tiempo nun falamos. Agora sí, engordamos considerablemente’l remanente.
Otru tantu podríamos dicir de servicios como’l de les actividaes deportives, que yá vimos l’añu pasáu no que terminó; un completu desastre, pa desesperación de los usuarios.
Per otru llau estes obres que pretenden facese, y que nun tán nos presupuestos, precisen toes d’un espediente de cambéu de creitu, y ésti rique d’un ineludible pasu y aprobación pol Plenu municipal.
Nesti sentíu Pueblu como vien faciendo desque tien representación na Corporación va estudiar cada propuesta que se-y faiga y va votar lo qu’en conciencia-y paeza más fayadizu pa los intereses de Ribeseya / Ribadesella, y como nel apartáu anterior vamos poner un exemplu pa que tol mundu pueda entendelo.
En xunu de 2016 l’Equipu de Gobiernu de Foro, llevó a Plenu un espediente de cambéu de creitu pa que con cargu al remanente s’acometieren les obres d’arreglu de la cubierta de la pista polideportiva de La Talaya que xubíen a 85.000 euros; esi espediente aprobóse colos votos a favor de Foro y Pueblu. El PP agora autonomáu adalid de toes estes obres, curiosamente votó en contra de dichu espediente y con un argumentu entá más interesáu ,viendo la so actuación estos últimos díes; reproducimos un estractu d’un artículu del diariu El Comerciu, publicáu’l 20 de xunetu de 2016, tres una entrevista realizada al voceru del PP: “El PP entiende que los cambeos presupuestarios nun tienen de marcar el modelu de xestión municipal, «porque tamos desvistiendo a un santu pa vistir otru». Considera que la obra ye necesaria, «pero recoyida nel marcu presupuestariu». Y concluyó asegurando que’l PP va llanzar un «abasta yá a los cambeos presupuestarios»”. Nel mesmu Plenu cola so abstención el PP facilitó, que pol mesmu mediu’l Conceyu de Ribeseya / Ribadesella se gastara más de 8.000 euros, en dos señales informatives pa l’autovía, como siempres dicimos nestos casos, cuestión de prioridaes.
Por resumir tamos asistiendo a unos actos de demagoxa dignos d’un guión de Berlanga, y que posiblemente tenga que ver con que nos atopamos nun añu preelectoral. En concencia les plaques que se suelen asitiar nes obres recordando quien gobernaba cuando s’inauguraron y les semeyes de besos y abrazos tres alcuerdos presupuestarios, nun tienen cabida nos pidimientos de Pueblu pa sofitar unos presupuestos como son: la creación d’una bolsa de beques non universitaries, la inversión en formación pa desaniciar la violencia machista, participación ciudadana, fomentu del empléu, ayuda al emprendimientu, etc…