La Sienda de Tito Bustillo

Nel últimu Plenu preguntamos poles obres de la Sienda de Tito Bustillo, preguntamos pol anchor final que va quedar na curva del Picu Ramonón, según el proyectu pocu más de 4,5 metros y l’idea ye que los autobuses que vaigan a la cueva aparquen nel aparcamientu que tien el conceyu en La Güertona, ¿cómo se va a regular el pasu por esa curva?, preguntamos pola peligrosidá de les vigues que van sostener la pasarela, asitiaes nel llugar onde de normal se salen los coches nesa curva, teniendo en cuenta que según el proyectu, entá queden unes faroles qu’asitiar a la derecha d’éstes. Preguntamos el porqué de la non sustitución de gran parte de los bordiellos de formigón que dixebren el carril bici de la calzada. Preguntamos pola desapaición de bona parte de los árboles del paséu, cuando según el proyectu non podíen tocase y pa otres coses el proyectu yera inamovible, y si non que-y lo pregunten al vecinderu d’El Tocote. Preguntamos pola comisión, que la mesma Alcaldesa prometiera inminente nel Plenu anterior, cifrando nun 90% les posibilidaes de que fora na selmana siguiente a dichu Plenu, llástima quedamos nel otru 10%. La única respuesta que l’Alcaldesa nos dio a too ello foi que la comisión celebraríase, y citamos palabres testuales “en cuanto tengamos tolos datos definitivos, porque nesti proyectu tán pasando coses que s’escapen al control de tol mundu”.
Mentanto la fin de selmana del ponte tuvimos pasu alternativu…

Un nuevu serviciu privatizáu

Al últimu Plenu llevóse l’aprobación de los pliegos para la llicitación del serviciu d’ayuda a domiciliu y tresporte adptáu. Pueblu pidió que se puntuara positivamente a les empreses qu’ameyoraren les condiciones de trabayu del personal y contestósenos que nel pliegu yá veníen calculaes el costu de les hores en función del conveniu y que eso yera bastante.

Plantegamos qu’en llugar de cubrir les baxes de personal del CRAD, tal y como diz el pliegu, cubriéranse cola bolsa d’empléu que pa tala fin se creara, en llugar de faelo con personal de la empresa concesionaria, contestósenos que se faía por operatividad e inmediatez ¿De qué sirve crear una bolsa d’empléu, si dempués nun la faemos operativa?
Pidimos, qu’hubiera más d’una persona responsable de la contratación, por tresparencia y para evitar suspicacies, contestósenos qu’esa yera la persona fayadiza y que nun se pensaba n’amplialo.
Nel so momentu y por cuenta de les distintes negociaciones presupuestaries, pidimos que s’ameyorara, el vehículu col que s’emprestaba’l serviciu de tresporte del CRAD, naquel momentu l’Equipu de Gobiernu nun lu consideró oportunu, güei atopamos con que ye otru nuevu serviciu municipal que se privatiza y con un costu envaloráu para los 5 años que se preven (2+3) de casi 112.000 euros, ¡con bastante menos mercabase’l vehículu necesariu!
Por toes eses coses votamos en contra de que se licitara el serviciu con estos pliegos.

Les formes de Foro Ribadesella

Éstes son les formes del Equipu de Gobiernu del Conceyu de Ribeseya . El día del Plenu y a les 12 de la mañana, únviennos por corréu electrónicu ensin nengún otru tipu d’avisu, un informe de secretaria sobro una sentencia desfavorable en redol a la disputa que caltien el Conceyu sobro la titularidá d’una parcela nos Campos de Oba. La sentencia dictóla’l xulgáu de Cangues d’Onís el 23 d’ochobre y fainos llegar 7 díes dempués l’informe a 8 hores escases del Plenu y ensin tiempu material pa buscar el pertinente asesoramientu.

Dempués nel Plenu, métese d’urxencia un puntu pa tomar una decisión sobro si recurrir o non la sentencia. Dicha urxencia hai que votala, y cuntó col sofitu de tolos grupos municipales sacante’l de Pueblu que nos abstuvimos.

A la de votar sobro si se recurría o non la sentencia Pueblu abstúvose, non porque nun quixera tomar una decisión al respective, nin porque-y diere lo mesmo, fízolo por responsabilidá, yá que al nun tener tiempu material pa percanciar dalgún tipu d’asesoramientu nun nos paeció oportunu dexanos llevar polos nuesos impulsos.

Lo realmente inaudito a la nuesa manera de ver, ye que Foro Ribadesella tamién s’abstuviera, pos ye de suponer que conoceríen la sentencia con tiempu abondu como pa formase una opinión al respective.